Со пцовки и закани, двајца насилници, инаку приматели на социјална помош, вчера напладне упаднале во кочанскиот Центар за социјална работа. Прво им се заканувале на тројцата вработени, а потоа и физички ги нападнале, нанесувајќи им телесни повреди.
Причина за нападот била исплатата на социјалната помош која наместо на рака, сега се исплаќа на трансакциона сметка.
Бидејќи насилниците не ја ажурирале документацијата или сметките им биле блокирани од страна на извршител, тие пари не добиле. За ова вината ја префрлиле на Центарот за социјални работи во Кочани, по што подебелиот крај го извлекле вработените.
Против напаѓачите ќе биде поднесена кривична пријава за сторено кривично дело „насилство“.
