Одделот за недозволена трговија со дрога при МВР вчера пресече меѓународен канал за транспорт на кокаин на релација од Јужна Америка во Република Македонија.
МВР денеска соопшти дека по добиени оперативни сознанија вчера дека е пристигнат пакет во ЕМС Пошта 2 – Скопје во Скопје, во која има кокаин, по издадена наредба од Истражен судија од Основен суд Скопје 1, Скопје, извршен е претрес на поштенската пратка пристигната од Аргентина, во која се пронајдени повеќе предмети, меѓу кои две пластични туби од креми од по 200 мл (вкупно 400 мл).
Поради постоење основано сомнение дека истите се исполнети со течен кокаин, тубите се предадени на Одделот за криминалистичка техника при МВР заради вештачење. Констатирано е дека во тубите течниот кокаин бил спакуван во презервативи, а остатокот од масата во тубите била исполената со крема, така што на тој начин биле минувани царинските контроли бидејќи кога тубите ќе се притиснат излегувала кремата, додека спакуваниот течен кокаин бил на дното. Внатрешноста на пластичните туби била исполнета со 300 мл течен кокаин.
Цената на дрогата зависно од тоа дали би се продавала на друг купец или пак на мало се движи од 20.000 до 60.000 евра.
МВР на Република Македонија работи на целосно расчистување на случајот односно откривање на сторителите на кривичното дело.