„Би сакал да Ви упатам најсрдечни честитки по повод Меѓународниот ден на Бошњаците, и во свое лично име и во името на Владата на Република Македонија да Ви посакам здравје и среќа, семејна благосостојба, и многубројни успеси на секое поле“, вели премиерот Груевски во писмената честитка.
„Историското присуство на бошњачката заедница во Република Македонија, како и секојдневниот придонес што Бошњаците го даваат во сите сфери на општественото живеење претставуваат значаен сегмент во напредокот на нашата држава и во градењето на мултиетничко општество во кое дијалогот, меѓусебната толеранција и почитувањето како универзални вредности имаат длабока традиција.
Владата на Република Македонија, како досега така и во иднина ќе продолжи да инвестира и да го поддржува развојот на културните, образовните, економските и сите останати општествени капацитети кои се од интерес на бошњачката етничка заедница. Уверен сум дека и во идниот период, со заеднички сили, и верувајќи во заедничките вредности, ќе продолжиме со соработката и со вложувањето на нашите потенцијали за создавање на дела кои се од интерес за сите граѓани на нашата земја, и во изградбата на силна и модерна Република Македонија.
Дозволете ми уште еднаш да ги повторам моите искрени честитки со желба да го поминете овој празничен ден во пријатно расположение во кругот на најблиските“, заврши Груевски.