На помалку до 48 часа до пленарната седница во Собранието на која единствена точка е гласање на потребата од отворање на Уставот, пратеничката група на ВМРО-ДПМНЕ останува на ставот дека измени на уставот во факов формат и под бугарски диктат, нема да поддржат.
– Истото ќе го повториме и на пленарната седница и ќе биде добра можност да се види дека власта цела година лаже и манипулира со бројките за уставни и дека таа е не е ни блиску до уставни измени. Власта е разголена и тоа се случува секогаш кога личните интереси се ставаат на прво место. После оваа седница очекувамо одговорност – истакна координаторот на пратеничката група на ВМРО-ДПМНЕ, Никола Мицевски.
Најголемата опозиција партија ќе дозволи да почне седницата, ќе учествува на неа и ќе ги образложи своите аргументи, а очекува да биде ставен предлогот на гласање за конечно да се види дали СДСМ и ДУИ имаат гласови од 80 пратеници потребни за отворање на Уставот.
– Да дозволиме да почне седницата, ќе го видите настапот на ВМРО-ДПМНЕ и аргументирано ќе објасниме ова што е став сега на пратеничката група. До мене тоа што е стигнато е дека пратениците немаат никакви притисоци, туку имаме поддршка од граѓаните кои на улица не застануваат и бараат да не отстапиме. Процедурата е јасна, јас се надевам дека ќе го стават на гласање и македонската јавност ќе види со кого ќе има работа – порача Мицевски.
