Со денешната последна сесија на „Охридски дијалог“ на која учествуваше министерката за одбрана, Радмила Шеќеринска и советникот за надворешна политика на премиерот Зоран Заев, Дане Талески, заврши овогодинешната средба на членови на Владата на Република Северна Македонија, претставници на Атланскиот совет и поранешни и сегашни ЕУ и НАТО дипломати кои низ стратешкиот дијалог работеа на унапредување на прогресивните и напредни решенија за предизвиците со кои се соочува Северна Македонија и регионот, информираат од владината прес-служба.
Дел од темите кои беа, информираат од таму, анализирани беа и придонесите, но и придобивките на Северна Македонија, кои треба да се очекуваат во последните месеци пред станување полноправна членка на НАТО, но и во периодот кој ќе следи.
Говорниците се согласија дека Северна Македонија во последните две години стана извозник на стабилност и демократија. Безбедносните реформи кои беа преземени, како и постојаната работа на унапредување на стабилноста на институциите на системот треба да бидат континуиран напор.
„Охридскиот дијалог“ кој е во организација на Охридската група, Владата на Република Северна Македонија и Атланскиот совет се одржа во текот на изминатите три дена.
