До Државната изборна комисија се поднесени пет кандидатури за градоначалник на Општина Охрид. Кандидати за градоначалник се двајца доктори, полицаец, студент и градежен инженер.
Кандидат на СДСМ е актуелниот вршител на должност градоначалник – Константин Георгиевски, лекар, специјалист по интерна медицина, неврохирургот Митре Милошески е кандидат за градоначалник од ВМРО – ДПМНЕ.
Полицаецот Стече Стевоски е кандидат за градоначалник од Партијата Демократи. Тој за градоначалник, како независен кандидат, се кандидираше и на изборите во 2017 година и освои 679 гласови односно 2.01 % од гласовите.
Кандидат за градоначалник од Граѓанско демократската унија е градежниот инженер Михаил Трендафилов – Нанче, а петтиот кандидат е студентот и актуелен советник во Советот на Општина Охрид, Џемал Мена од БЕСА. Мена е советникот кој лани во октомври предложи Општина Охрид од буџетот да одвои 1 милион денари за лекување на охриѓанката Сара Настеска која боледува од малиген тумор. Предлогот беше отфрлен со објаснување дека ако еднаш се одвојат пари од буџетот, тоа ќе треба да се прави за секое дете.
На претстојните претседателски избори Охрид ќе избира и градоначалник поради ненадејната смрт на Јован Стојаноски на 15 декември минатата година. Стојаноски беше избран за градоначалник на Охрид во октомври 2017 година.
Кристијан Ландов