Пред средбата со коалицискиот партнер Али Ахмети, премиерот Заев најави дека денеска планира да се сретне и со претставници на другите партии за да разговара за заеднички претседатеслки кандидат. Тоа, како што рече, било дел од идејата „едно општество за сите“ и во таа насока ќе се обиде да се договори и со Села и Касами.
„Денеска продолжуваме со средбите со политичките партии на нашите коалициски партнери од албанскиот блок. Прво ќе има средба со ДУИ, а потоа продолжуваме со Беса на Африм Гаши, како и со Мендух Тачи. Ќе направам напори и сакам да се видам и со Зијадин Села од Алијанса на Албанците и Беса на Билал Касами за да можеме да поразговараме и да видиме дали можеме сите да застанеме зад заеднички кандидат кој е прифатлив за сите граѓани од секаква политичка, етничка и социјална припадност. Верувам дека тоа е изводливо. Ако го направиме тоа, уште еднаш го потврдуваме ‘едно општество за сите’ и праќаме сериозна порака за охрабрување кон граѓаните за нашата одговорност да се надминеме себеси и да застанеме зад личност за која однапред веруваме дека ќе биде одличен претседател на Република Северна Македонија“, изјави Заев.
Заев додаде дека поддршка за консензуален кандидат за претседател добил на вчерашниот состанок со другите коалициските партнери.
Галена Николовска-Ризвановиќ
