Поетот Игор Исаковски почина вчера во својот дом во Скопје на возраст од 44 години. Исаковски беше присутен на македонската книжевна сцена пред се како поет, а потоа како издавач, основач и главен уредник на издавачката куќа „Блесок“.
Исаковски е роден на 19 септември 1970 во Скопје. Работел како радио и ТВ водител од 1991-1999, 2001-2003, на различни фреквенции. Дипломирал на катедрата за Општа и компаративна книжевност во Скопје, магистрирал на Централноевропскиот универзитет во Будимпешта (Родови и културолошки студии). Преведуваше поезија, проза и есеи, од (и на) македонски, англиски, словенечки, српско-хрватски-босански-црногорски.
Основач и директор е на културната установа „Блесок“, каде што работеше како главен и одговорен уредник на истоименото списание.
Автор е на романите „Писма“ (1991) и „Пливање во прашина (2005) за кој ја доби и наградата „Прозни мајстори“.
„Црно Сонце“ (1992), „Вулкан – Земја“ (1995), „Небо“ (1996), „Длабоко во дупката“ (2004), збирката раскази „Песочен часовник“ (200), се само дел од неговите дела.
Беше уредник на списанието на Независни писатели на Македонија, „Наше писмо“.
Во негов превод на македонски, објавени се книгите на Алеш Дебељак (2), Лудвиг Гиц, Марија Тодорова, Душан Гојков, Клод Фримен, Роберт Млинарец, Јосип Ости (8), Рони Сомек, М.Т.Ц. Кронин, Горан Глувиќ, Томас Шапкот, Џек Галмиц, Герит Бусинк, Ханс ван де Ваарсенбург, Том Петсинис (2), Сибила Петлевски (2), Хенк ван Керквијк (Дејвид Винвуд), Павле Горановиќ, Предград Луциќ, Хенри Милер, Оља Савичевиќ Иванчевиќ, како и една антологија на црногорската поезија.
Делата на Исаковски се објавени на англиски, холандски, романски, словенечки, хрватски, српски, бугарски, црногорски, босански, чешки, унгарски, полски, словачки, корејски, хебрејски и турски, во дваесетина земји.
Погребот на македонскиот поет ќе биде утре во 13 часот на градските гробишта во Бутел.