По три години и шест месеци затвор добија Исмет Гури и Ејуп Алими од ДУИ и во повтореното судење за „Титаник 3“ денеска во Основниот кривичен суд во Скопје.
Двајцата беа обвинети за уништување изборен материјал, односно дека на локалните избори во 2013 хгодина менувале дел од записниците за гласањето во Чаир.
Судијката Марија Клетничка-Марковска им изрече идентични казни како и во првиот судски процес кој беше поништен од Апелацискиот суд во Скопје кој ја укина пресудата и го врати случајот на почеток.
Оваа пресуда повторно не е правосилна и функционерите на ДУИ имаат право на жалба до Апелација.
Двајцата провостепено осудени се единствените поистакнати функционери од ДУИ за кои се дојде до пресуда во случаите што ги отвори Специјално јавно обвинителство (СЈО).
Гури во моментов е заменик-управник во УЈП, а Алими државен советник во министерството за политички систем со кое раководи Артан Груби.