Ова е барањето што во името на СДСМ во понеделникот ја изнесе партискиот секретар Андреј Петров. Оттаму сметаат дека премиерот Груевски треба да се изјасни за овие прашања кои се од клучно значење за државата.
„Го повикуваме Премиерот, во најскоро време да се изјасни во однос на содржината на меморандумот, да каже што планира да преземе во врска со иницијативата од страна на Грција и да и соопшти на јавноста што подразбира иницијативата на комесарот Филе, за добивање на датум за преговори во декември, а во врска со забрзувањето на процесот на преговори со Грција за изнаоѓање на компромисно решение за спорот со името”, рече Петров.
„Она што зачудува е што во истиот период, Премиерот Груевски го гледаме како промовира тениско игралиште во Орешани, како игра фудбал во сала и како промовира нови членови на ВМРО-ДПМНЕ на партиски настани, а притоа одбива да се изјасни по прашањата кои се од клучно значење за иднината на државата”, рече Петров.
Не слушнавме став, ниту за новата форма за забрзување на преговорите околу спорот со името промовирана од страна на комесарот Филе, ниту пак оценка за меморандумот предложен од страна на Грција.
Не знаеме дали Премиерот планира да го потпише овој меморандум, дали планира да го отфрли или планира да понуди сопствен предлог како можност за интензивирање на преговорите околу спорот за името.
Сакаме да го повториме нашиот став, дека го поздравуваме фактот што Грција покажа било каква иницијатива за решавање на спорот со името кој самата го наметна, но меморандумот во онаа форма во која е предложен, сметаме дека е неприфатлив за Македонија и дека треба да се отфрли.
Евентуалното потпишување на предложениот меморандум од наша стана, онака како што е предложен, ќе нанесе непоправлива штета на македонските национални интереси, бидејќи меморандумот прецизно ја ограничува рамката во која би се воделе евентуалните преговори, што не е во наш интерес.
Затоа го повикуваме Премиерот, во најскоро време да се изјасни во однос на содржината на меморандумот, да каже што планира да преземе во врска со иницијативата од страна на Грција и да и соопшти на јавноста што подразбира иницијативата на комесарот Филе, за добивање на датум за преговори во декември, а во врска со забрзувањето на процесот на преговори со Грција за изнаоѓање на компромисно решение за спорот со името, заврши Петров.