Попладнево на коронавирус беа тестирани 10 пациенти, од нив 5 се позитивни на вирусот, информираше министерот за здравство Венко Филипле.
Позитивна е сопругата на веќе дијагностицираниот пациент од Скопје и четири здравствени работници – двајца доктори и две медицински сестри од Дебар. Со ова, бројката на заболени со коронавирус во земјата се искачи на 31.
Докторот Арбен Аголи кој е педијатар од Дебар предмалку на социјалните мрежи објави дека персоналот во неговата амбуланта има позитивен резултат на извршено тестирање за коронавирусот. Тој пишува дека ќе се затвори амбулантата во следните две недели.
„Бидејќи персоналот испадна позитивен од утре амбулантата е под карантин две недели“, пиша Аголи на социјалните мрежи.
Докторот има ординација која е под концесија во зградата каде што се наоѓа и дебарската болница, во која пак, се лекуваат пациенти заразени од коронавирусот.