Канцеларијата за печат при Светиот Престол во Ватикан, денеска, ја објави програмата за посетата на Папата Франциск во Северна Македонија.
Предвидено е утрото на 7 мај Папата да пристигне во Македонија, а по официјалниот пречек, тој д а ја оствари и првата средба и тоа со претседателот Ѓорге Иванов. Покрај средбата со Иванов Папата ќе се сретне и со премиерот Зоран Заев, како и со претставници на граѓанското општество и дипломатскиот кор.
За време на својот престој во земјава, Папата Франциск ќе се сретне со верските лидери и со сиромашни лица.
„Во програмата за апостолското патување на Папата Франциск во Северна Македонија предвидено е Светиот Отец да служи света Литургија, а потоа да присуствува на екуменска и меѓурелигиска средба со млади.
Светиот Отец, своето 29-то апостолско патување ќе го заврши во попладневните часови на 7 мај, одржувајќи средба со свештениците, нивните семејства и богопосветените лица, а потоа ќе се врати во Рим.
Претходно Светиот Отец ќе ја посети Република Бугарија и градовите Софија и Раковски“, се вели во соопштението на Влада.