Телевизија Глоби е името на новиот медиум на гостиварското подрачје кој деновиве почна со работа. Според најавите, со сопствена продукција и информативни емисии ќе почне од мај.
Засега, сигналот со тест-програма се емитува преку кабелските оператори. Покрај музички спотови, гостиварци можат да проследат и куси вести.
Блерим Мустафи, сопственикот и директор на „Г-ТВ“ фирмата под чија капа работи телевизијата, вели дека идејата да отвори телевизија следи по неговото повеќегодишно работење како новинар.
– Освен, како новина што сме целосно дигитализирани, нашите програмски содржини ќе внесат и поквалитетен начин на пренесување на информацијата. Иако форматот на телевизијата е повеќе од забавен карактер, значителен дел од ресурсите ќе бидат насочено кон информирањето. Сметам дека на граѓаните им е потребно објективно и коректно информирање. Тоа ќе биде и основниот принцип на работа, вели Мустафи.
Тој појасни дека се при крај со подготовките и создавање на тим од репортери, камермани и технички персонал. Наскоро ќе излезат и на терен и ќе ги усовршуваат техниките. Во тимот на ТВ Глоби покрај локални новинари ќе бидат поканети да се приклучат и познати тв-лица.
Седиштето и студијата на телевизијата е во Сити Центар во Гостивар.