Јас, како политичар, не верувам во замрзнати конфликти, само во замрзнати решенија! Потребен ни е рецепт за успех, а не за катастрофа – порача минстерот за надворешни работи, Бујар Османи на сесијата за прашања и одговори со европратениците-членови на Комисијата за надворешни работи на Европскиот Парламент-АФЕТ
„Целта во разговорите со соседна Бугарија е да се врати довербата во процесот, да се надминат предизвиците кои произлегуваат од различните толкувања и да се најдат точки за приближување и заедничко обележување на историски настани и личности. Меѓусебното почитување и разбирање треба да бидат основа на секое вистинско пријателство. Така гледам на овој проблем, така и ќе го надминеме, со дипломатија и дијалог“, нагласи Османи.
Министерот пред пратениците ги презентираше и реформските постигнувања на земјата во изминатиот период, притоа, искористувајќи ја можноста да информира за обновениот и зајакнат фокус во испорачувањето резултати од областа на владеењето на правото и борба против корупција во првите 100 дена на владеењето на новата влада.
На состанокот на Комисијата беше презентиран и првичниот драфт од Резолуцијата на Европскиот Парламент за прогресот на земјата, подготвен од известителот, европратеникот, Илхан Кјучук, во кој се поздравува убедливиот и доследен напредок на Северна Македонија во евро-интегративниот процес.