Судечкиот совет кој го води случајот „Титаник“ за изборни нерегуларности по барање на Специјалното јавно обвинителство донесе решение согласно член 365 став 3 од ЗКП на обвинетиот експремиер Никола Груевски да му се одреди мерка притвор во траење од 30 дена, започнувајќи од негово пронаоѓање и лишување од слобода.
Мерката притвор беше побарана на минатото рочиште од страна на обвинителката на СЈО Лиле Стефановска.
Претходно, Судот одлучи на Груевски да му се суди во отсуство.
Притворот е определен по доставеното известување од Собранието дека на Груевски кој се уште се води како пратеник во Парламентот му е одземан пратеничкиот имунитет.
За Груевски исто така по барање на СЈО определено е мерка притвор и за предметите „Траекторија“, „ТНТ“ и „Насилство во Центар“.
По пресудата за случајот „Тенк“, експремиерот Никола Груевски илегално ја напушти земјата и побегна во Унгарија каде што доби политички азил.
Тој за набавката на луксузниот „мерцедес“ од 600 000 евра е осуден на две години затвор.
Виктор Јованов