Невладината организација „Охрид СОС“ реагира на носењето на новиот закон за легализација на дивоградби, за кој тврдат дека носи само намалување на глобите за прекршување на законот и нема никакви посебни измени посебно за Охридскиот регион. Тие се сомневаат дека законот може да донесе нов урбанистички хаос, бидејќи не е прецизирано како ќе се регулира легализацијата во Охрид, Струга и Дебарца, односно деловите надвор од УНЕСКО.
„Јавноста е целосно отсечена и целосно ѝ е одземено правото да учествува во процесот на усвојување на еден од најштетните закони во Македонија. Затоа, бараме веднаш да биде јавно објавен новиот предлог-текст. Прашуваме, колку градежни инспектори (и општински и државни) во моментов имаат надлежност над Охридскиот регион и на кој начин се определува нивниот број? Имајќи ја предвид исклучителната вредност на регионот, бараме зголемување на бројот на градежни инспектори што активно работат на терен во корист на јавниот интерес и во служба на законите со цел бесправното градење да се сузбие наместо да се озаконува“, велат од „Охрид СОС“.
Еко-здруженијата стравуваат дека овој закон дополнително ќе го загрози УНЕСКО-статусот на охридско-струшкиот регион. Владата минатиот месец усвои потреба за донесување на нов закон за легализација на дивоградби. Предлог-законот ги опфаќа и дел од охридските дивоградби, но не оние кои се во делот на регионот заштитен од УНЕСКО. Оттука, се погласни се тврдењата дека Охрид во февруари, сака пред Комитетот на УНЕСКО да покаже помалку дивоградби од утврдените во регистарот кој го изработи годинава.