Силен налет на ветер рано утрово урна едно од дрвјата на главното градско шеталиште Кеј „Македонија“ во Охрид, во близина на езерото. Дрвото паднало директно на пешачката патека и целосно го блокирало пристапот, но за среќа во инцидентот нема повредени.
Настанот се случил во раните утрински часови, кога движењето на граѓаните е минимално, што, според првичните проценки, спречило можни посериозни последици.
Од ЈП „Охридски Комуналец“ потврдија дека екипите веднаш излегле на терен по добиената пријава. Утрово тие работат со механизација на сечење и отстранување на паднатото дрво, со цел што побрзо да се расчисти делот и да се нормализира движењето на шеталиштето.
Според првичните информации, силниот ветер кој дуваше во текот на ноќта и раното утро е главната причина за уривањето на дрвото.
Очекувањата се дека Кеј „Македонија“ ќе биде целосно расчистен и повторно прооден до крајот на претпладневните часови. Инцидентот повторно ја отвора потребата од редовни проверки на стабилноста и состојбата на дрвјата долж шеталиштето, особено со приближувањето на зимскиот период кога се очекуваат посилни ветрови и врнежи.