Судијката Лидија Петровска го одби барањето на адвокатите на Грујевски да нема судење без екстрадиција. На ексначалникот на УБК сепак ќе му се суди во отсуство.
Адвокатот Љупчо Шврговски на денешното рочиште пред судијката Лидија Петровска, која го води случајот за предметот Тврдина 2 во кој првообвинет е ексначалникот на Петтата управа Горан Грујевски со уште шест службенички во УБК, рече дека постојат правни пречки да му се суди на Грујевски во отсуство, бидејќи тој во Грција е лишен од слобода односно е во екстрадициски притвор.
Според Шврговски, судењето во отсуство не може да се реализира сè додека не заврши екстрадицијата.
Адвокатот се повика на Законот за кривична постапка и рече дека доколку му се суди во отсуство ќе му биде повредено правото на одбрана. Тој бара главната расправа да се одложи на неопределено време, бидејќи не се знае кога ќе заврши процедурата за екстрадиција.
Трајче Пеливанов, обвинителот од СЈО, барањето на Шврговски го оцени како неосновано, бидејќи судењето во отсуство на Грујевски не му го ускратува правото да бара повторување на постапката. Тој рече дека станува збор за предмет директно поврзан со скандалот со прислушувањето.