Обвинителството го очекува извештајот од претресите во КПУ Идризово, каде беа најдени два тунели кои затвореници ги подготвувале за бегство од најголемиот затвор во Македонија. Од таму за А1он велат дека откако ќе го добијат извештајот, ќе може да даде повеќе информации.
Од МВР пак, остануваат на вчерашното соопштение, дека под координација на скопското обвинителство и по барање на КПУ Идризово, дале асистенција на затворот во вршење на претреси на повеќе простории со цел обезбедување доказен материјал поради сомневања за кривично правни дејствија. Претресите според нив се завршени и сите активности поминаа без никакви проблеми, но од овие информации, нема официјална потврда ниту дали затворениците кои сакале да избегаат биле пресретнати.
Официјални информации засега не дава ниту директорот на Управата за извршување на санкции, Јовица Стојановиќ, кој информациите ги чека од директорот на Идризово.
Тунел подготвен за бегство во Идризово беше пронајден пред само една година, кога под сомнение дека помагале во ископот беа и вработени во затворот.
