Обвинителството за организиран криминал и корупција вели дека глисерот во Охрид е одземен за да послужи како доказ во постапката за изнудување рекет. Оттаму не одговараат на прозивките од сопственикот Марјан Грунчев, кој во изјава за „А1он“ вели дека му е одземен по грешка, ниту, пак, кажаа дали ќе му го вратат.
„Преземаме дејствија за расчистување на кривично-правниот предмет. Глисерот е одземен за да послужи како доказ во постапката, согласно одредбите од Законот за кривична постапка. Со цел да не се попречи на натамошното водење на истрагата, не сме во можност да споделиме повеќе детали“, велат од обвинителството.
Од обвинителството велат дека до овој момент истрагата не е проширена, односно сопственикот на глисерот не е опфатен во постапката за рекет.
Грунчев вели дека се познава со Кичеец, кој се возел во глисерот, и додава „Можеби затоа е дојдено до таква забуна“. Пловниот објект е огласен за продажба, а неговата цена е 50 илјади евра. Иако во огласот пишува дека се наоѓа во Охридско Езеро, одземениот глисер се наоѓа во магацините на охридската касарна.