По прегледот на најновите предлог закон за медиуми и за аудиовизуелни медиумски услуги, ОБСЕ укажува дека има сеуште проблематични одредби, нејасни формулации кои можат да се злоупотребуваат во пракса. Претставничката за слободата на медиумите Дуња Мијатовиќ ги поздрави напорите од страна на властите во Скопје да се усогласи законот со меѓународните стандарди, но изрази загриженост и со писмо до министерот Иво Ивановски бара да се доработат законите
„Со оглед на моменталната состојба на слободата на медиумите во земјата, јас сум загриженa дека овој закон може да се користи за замолчување на критичките ставови и за ограничување на слободата на говорот. Додека голем број на прописи се прифатливи, јас сум загрижен дека употребените формулации би можело да доведат до злоупотреба“, рече Мијатовиќ.
Во писмото испратено до министерот за информатичко општество и администрација, Мијатовиќ ги истакнува клучните прашања кои треба да се решат:
– Моќна улога на Агенцијата за медиуми и нејзиниот состав не гарантираат независност на медиумите и новата супервизорската функција (член 29) се заканува и може да овозможи потенцијално интервенирање во содржините на печатените и онлајн медиумите.
• Постоечките казни во законот се значително високи, нема поединечни степени на казнување, и во крајна линија предизвикуваат загриженост дека непропорционалните санкции може да доведат до самоцензура.
• Деловите за а прашањата за националната безбедност,за поттикнување нетолеранција или омраза се премногу нејасни и би можеле да бидат злоупотребени.
• Нема потреба да се дефинира кој е новинар во законот. Дефиницијата е излишна, а исто така може да се користи да се исклучат некои медиумски работници и луѓето кои се ангажирани во новинарството.
• Инсистирањето на тоа дека “мнозинското новинарско здружение ” ќе земе учество во Агенцијата за медиуми и во Управниот одбор на јавниот сервис го носи ризикот од тензии меѓу здруженијата, пособено во услови кога се тврди дека има притисок врз новинарите да се приклучат на одредена асоцијација. Ова треба да се избегне.
„Ја поздравувам соработка на власта со мојата канцеларија за овој важен закон и со нетрпение очекувам нов нацрт, кој ќе ја заштити слободата на медиумите и слободата на изразување во земјата“, заклучува Мијатовиќ.