Националниот Ромски Центар ја поддржува интеграцијата на Македонија во европското семејество, а значајно е да се вклучиме и во сојузот со кој се гарантира безбедноста на државата, изјави денеска извршниот директор на НРЦ, Ашмет Елезовски.
Тој информираше дека НРЦ со поддршка на европските фондови, изминативе години реализираа многубројни проекти со кои се јакнеше капацитетот на ромската етничка заедница, на ученици, лица без документи, жени. НРЦ, информираше е дел од Граѓанската иницијатива „Зачекори напред“, и заедно со останатите граѓански организации ја почнува информативна кампања преку која, во наредните денови, на граѓаните ќе им овозможи подобар пристап до релевантни информации поврзани со придобивките и предизвиците од зачленувањето во Европската Унија и НАТО.
– Фондовите им стојат на располагање на сите заинтересирани, на интектуалци, компании, граѓански организации и може да се каже дека Европа нуди можност за остварување на замислените креации од кои бенефит имаат различни категории граѓани, изјави, Елезовски.
Според него значајно е да се запознаат граѓаните со принципите на владеењето на правото во ЕУ, чија крајна заштита е право на развој на граѓанинот.
Перспективна Македонија и евроатлантските интеграции се она за кое залагаат сите политички субјекти, вели Елезовски, но останува екслузивно правото, граѓаните самите да одлучат за ова прашање.
– Граѓаните сами ќе одлучат, демократијата е тоа и треба да се почитува зборот на граѓанинот, рече Елезовски.
Кампањата е информативна и не ги наведува граѓаните на конкретни чекори во однос на гласањето.