Дали по денешната информација дека „Орка холдинг“ на Орце Камчев, ќе основа и интерактивен портал – „Телеграф МКД“ по примерот на светските модерни интернет портали, кој ќе биде единствениот портал во Македонија составен од независна редакција од 50 новинари која ќе биде активна 24 часа секој ден во неделата, на повидок е и формирање на нови медиуми подржани од власта?
Порталот ОхридСкај, повикувајќи се на партиски извори, објави дека ВМРО ДПМНЕ почнал со процес на регистрирање на нови „чисти“ компании за медиуми.
Од септември, објавија, ВМРО ДПМНЕ ќе создаде сопствена ТВ куќа, а досегашните СИТЕЛ и Канал 5 се „пуштаат“ по вода од 15 октомври.
Името на телевизијата не се објавува, но сопственици, тврдат извори на порталот, ќе бидат неколку фирми блиски до ВМРО ДПМНЕ, а HD опремата веќе се нарачува од странство.
Освен „Курир“ кој ќе биде комерцијално продаден, на лице блиско до партијата ќе бидат основани еден дневен весник, еден неделник, обата со строго десничарска уредувачка политика.
Во овие проекти, според порталот, ќе работат новинари и уредници на Сител, Канал 5, а „Вечер “, ВМРО ДПМНЕ ќе го финансира до декември.