Неџати Јакупи од ДУИ, како носител на листа на кандидати за пратеници од оваа партија во Четвртата изборна единица, денеска во Кавадарци ја презентираше програмата на партијата.
– Во три наврати ДУИ е дел од извршната власт и досега спроведувала проекти од економскиот развој на државата и мерки за излегување од глобалната криза. Сме учествувале во проекти околу даночната политика, создавање на поволна клима за привлекување на инвестиции, а бенефитите од тоа ги има почувствувано и Тиквешијата и поширокиот регион, рече Јакупи.
Потсети дека во овој крај и пошироко се отворени неколку фабрики во кои се вработени неколку илјади луѓе.
– Тука е и поддршката кон земјоделците воопшто, кон лозарите и сточарите. Имаме контакти и понатаму ќе ја зајакнуваме трговската размена со Косово и Албанија. Ќе работиме исто така на носење на нови инвестиции. Но, ќе работиме и на тоа да се зацврстува соживотот во Република Македонија и да се зачува културното наследство. Македонскиот рамковен договор веќе го земаат како пример други земји, рече Јакупи.