За партијата на Руфи Османи, тензиите меѓу владините партнери, ВМРО-ДПМНЕ и ДУИ, се само едни од низата вештачки тензии за маркетиншки цели.
„НДП е убедена дека спротивно изјавите на високи претставници на ДУИ и ВМРО-ДПМНЕ, овие политички партнери нема да го растурат сегашното владино мнозинство и нема да распишат предвремени парламентарни избори“, се вели во соопштението на НДП.
За партијата на гостиварскиот градоначалник, политичката дрскост на ВМРО-ДПМНЕ, негирањето и омаловажувањето на ОНА како и запоставувањето на жртвите Албанци од 2001 година и покрај повлекувањето на ДУИ преку извинувањето на министерот за одбрана, уште еднаш го потврдуваат етно-национализмот на ВМРО-ДПМНЕ во однос на Албанците во Македонија.
„НДП е убедена дека актуелната влада, ВМРО-ДУИ е влада без политички и меѓуетнички легитимитет која забележува сериозни неуспеси особено во нејзината економско-социјална и евроинтеграциска агенда. Потсетуваме дека сме подготвени за предвремени парламентарни избори и го повторуваме ставот дека најдобрата опција за државава е организирање на локални и парламентарни избори заедно, во 2013 година “, велат од НДП.
НДП предупредува, дека организирањето предвремени избори од сегашната влада, во суштина значи повторување на манипулациите од претходните избори .
Ова соопштение на НДП доаѓа по шпекулациите во јавнсота дека доколку ДУИ излезе од Влада, дел од гласовите за мнозинство , Груевски ќе ги пополнува и со двата пратеника од НДП.