Комисијата за прекршоци при МВР утврдила дека универзитетската професорка и активист за човекови права, Мирјана Најчевска, која беше дел од повеќе месечните протестите на Шарената револуција, е одговорна за фрлање на боја на објектите на државата, информираше таа преку социјалната мрежа „Фесјбук“, каде што додава дека сега е задолжена да плати казна од 200 евра.
„Ете денес ми стигнаа две решенија со кои Комисијата за прекршоци при МВР утврдува дека сум одговорна за фрлање боја на објекти на државата и ме задолжува да платам 200 евра.
Тоа онаа комисија која е под надлежност на теологот министер за внатрешни работи кој дојде на власт како резултат на Шарената револуција чиј дел бев и јас, а која што се состоеше токму во фрлање боја на институциите запоседнати од страна на режимот на Груевски со цел избегнување било кој облик на насилство). Имам намера да го оспорам Решението пред Управен суд, да поведам постапка за дискриминација и да му плукнам на Заев и на неговиот потрчко-теолог кој го поставил за министер за внатрешни работи под прозор.
И ги повикувам моите другарчиња од Шарената револуција кои во моментов топлат фотељчиња во власта да преземат нешто со цел запирање на натамошната виктимизација на учесниците во Шарената револуција кои не ги сместија задниците во фотељите во власта“, напиша Најчевска.