Министерството за Внатрешни работи преку соопштение се обидува да го спинува влезот на обезбедувањето на екс премиерот Никола Груевски во ТВ21.
Според нив, обезбедувањето постапувaло според планот и задачите и не влегло во телевизијата, туку во кафулето до телевизијата, велат од МВР, а кафулето е сопственост и територија на ТВ21 каде и го пронајдоа новинарот.
„Оперативните сознанија кои ги имаат за потенцијални ризици службените лица легитимирале еден граѓанин кој без да се идентификува започнал да снима. Без примена на сила тие го замолиле да ги избрише снимките кои ги направил. Според нивниот исказ тоа се случило во угостителски објект (кафуле), а не во телевизија како што беше објавено во некои медиуми. Доколку има било каква преставка против нив, Одделот за внатрешна контрола ќе постапува по истата“, стои во демантот на МВР.
Иако го бранат обезбедувањето, тие не објаснуваат како и со кој закон обезбедувањето на Груевски бара од новинар да ја избрише снимката и што го прави екс премиерот поразличен од другите граѓани, па не смее да биде сниман.