Веднаш по острите реакции на јавноста и на невладини организации, за интервјуто на јутуберот Стефан Лазаров со Драган Павловиќ-Латас, МВР превзела мерки за да се одреди дали има основ за понатамошно постапување.
Од МВР за А1он потврдуваат дека секторот за компјутерски криминал веќе превзел мерки и има документиран материјал.
„Денеска (20.02.2023), МВР поднесе Известување до надлежното Јавно обвинителство, во врска со претходно објавено интервју на С.Л. со Д.П.Л., како подкаст на Јутјуб канал. Имено, Известувањето е поднесено по преземени мерки и активности од страна на Секторот за компјутерски криминал и дигитална форензика, заедно со целокупниот документиран материјал за понатамошно постапување“ велат од МВР за А1он.
Како што објавивме претходно одделот за компјутерски криминал веќе за ова ги известил и од обвинителството, од каде за А1он потврдија дека предметот е стасан до нив и дека надлежен јавен обвинител ќе даде насоки за натамошни дејствија и проверки.
Во интервјуто во еден дел Латас раскажувајќи за своето прво сексуално искуство кажува дека како 15-годишник бил повикан од познаник кој му рекол да „влезе во фичото и да работи“ додека внатре била распарталена жена. Претходно Латас го опишува пријателот како син на полициски моќник во тоа време, кој си сакал сите девојки пред сексуалниот чин да ги „шамара“.