Министерството за образование и наука (МОН) ја поздравува одлуката на СОНК за ставање во мирување на генералниот штрајк закажан за утре, по денешната средба во Министерството, на која се разговарало по сите основи коишто во изминатиот период беа наведувани како причини за организација на штрајк.
– На средбата е договорено продолжување на социјалниот дијалог помеѓу двете страни, што попладнево резултираше со одлука на советот на СОНК за прекин на активностите за организирање на најавениот штрајк, се наведува во соопштението од МОН.
Согласно изнесената волја на двете страни, како што се наведува, МОН ќе продолжи максимално да се заложува и да придонесува за водење на ефикасен и ефективен социјален дијалог, како правен и демократски механизам преку кој и досега се реализираше одлична соработка и се унапредуваа бројни состојби.
– Министерството потврдува дека прифаќа и дебата за унапредување на системот на екстерното тестирање, но единствено во насока на зголемување на знаењето на учениците и подигнување на објективноста на наставниците при оценувањето, додека по однос на барањето за зголемувањето на платите на вработените во областа на образованието, истото е дефинирано во Програмата за работа на Владата, при што за оваа календарска година предвидено е зголемување за четири проценти. Во следните години, зголемувањето ќе зависи од буџетските можности, стои во соопштението од МОН.