Министерката за труд Рашела Мизрахи вели дека на семејството од Шуто Оризари чија куќа денеска изгоре во пожар и загинаа нивните две малолетни деца, понудено им е сместување и еднократна парична помош.
„Со голема тага ја примив веста за смртта на двете деца во пожарот во Шуто Оризари. Како родител, се сочувствувам со големата болка што ја почувствуваа денес нивните родители. Тоа е огромна човечка трагедија чија загуба е ненадмостлива и која не може да се изрази со зборови. Но, мора да се остане силен и човечен. Ќе сторам се што е во моја надлежност да им помогнам на семејствата. Знам, дека болката е ненадоместлива, но нивните браќа и сестри ќе ја имаат мојата максимална поддршка во секој поглед“, вели Мизрахи.