„Во отсуство на аргументи, откако министерот за информатичко општество и администрација Дамјан Манчевски, ги објави сите информации поврзани со годишните планови за вработување и новите вработувања во јавниот сектор, ВМРО-ДПМНЕ, денеска објавува документи кои само го потврдуваат тоа што Владата и МИОА го тврдат изминатиот период, а тоа е дека сите институции мора да ги почитуваат законите.
Имено, станува збор за извадокот од записникот од владината седница, каде јасно стои дека Владата со заклучок ги обврзува сите надлежни институции, меѓу кои и МИОА, да ги почитуваат законите кои се однесуваат на доставување и прифаќање на Годишните планови за вработување.
Притисоците и уцените врз вработените во јавната администрација во време на владеењето на ВМРО-ДПМНЕ, за кои деновиве постојано слушаме во рамки на судските процеси кои се водат, се минато.
Изминатата година тоа што ја карактеризира работата на Владата и МИОА, е почитување на законите кои сега конечно важат за сите. Документите кои ВМРО-ДПМНЕ ги објавува се само потврда за тоа“, се вели во реакцијата на Министерството за информатичко општество и администрација на прес-конференцијата на Никола Мицевски.