Министерот за образование и наука Пиштар Лутфиу денеска присуствуваше на одбележувањето на 7 Март-Денот на учителот и на 130-годишнината на првата албанска школа на Универзитетот „Мајка Тереза“.
– Кога се потсетуваме на 7 март 1887 година, се потсетуваме на првото училиште на албански јазик во градот Корча во Албанија. Отворањето на првото албанско училиште во Корча беше историски момент и голема победа за албанскиот народ затоа што дотогаш наставата се изведуваше во тајност во приватни домови. Во спомен на овој настан 7 Март се одбележува како Ден на учителот, истакна Лутфиу.
Нашиот предизвик, како што рече, е да обезбедиме квалитет во образованието, како неопходност во контекст на интеграција и достигнување на европските стандарди.
Тој им го честита 7 Март на сите наставници, професори и педагози.
Ректорот на Универзитетот „Мајка Тереза“, Азис Положани истакна дека Универзитетот е продукт на повеќегодишни напори на сите генерации за високо образование и за подобар живот. Појасни дека обезбедиле простории за настава пред да преминат во новиот објект.
Посочи дека во зградата на ССМ се прошириле со уште еден кат.
– Таму имаме три ката, што е сосема доволно, имајќи ја предвид природата на нашите студиски програми во мали групи. Имаме настава и во Универзитетот Југоисточна Европа, каде продолжува една студиска програма. Имаме простории и во основното училиште „Битолски конгрес“, рече Положани и додаде дека тоа е доволно за две до три години.
Најави дека инвестираат и во лаборатории, кои како што рече, ќе бидат стандардизирани според потребите.