Министерот за образование и наука Абдилаќим Адеми, придружуван од градоначаникот на Липково Садула Дураку, денеска го посети основното училиште „Фаик Коница“ во липковското село Слупчане, кое беше реновирано со грант од Амбасадата на Јапонија во Македонија.
– Соработката помеѓу Општина Липково и Амбасадата на Јапонија во Република Македонија придонесе учениците во ОУ „Фаик Коница“ во Слупчане да добијат нови, модерни училници, опремени со најсовремени материјали, кои ќе им помогнат во воспитно-образовниот процес, изјави Адеми, додавајќи дека Липково е меѓу ретките македонски општини што успеала да обезбеди донација за реконструкција на училишен објект на нејзина територија.
– Се надевам дека примерот на Липково ќе го следат и останатите локални самоуправи во Македонија и самостојно ќе успеат да најдат средства за подобрување на условите во училиштата, со што на своите ученици ќе им ги приближат европските и светските стандарди за изведување настава, рече Адеми.