Договорот за стратешко партнерство меѓу Македонија и Обединетото Кралство не содржи никакви одредби за изградба на бегалски кампови во земјава, изјави денеска пратеникот од ВМРО-ДПМНЕ, Антонио Милошоски.
„Станува збор за еден од посериозните документи што сме ги потпишале со сериозна држава како Британија. Договорот предвидува инвестиции и инфраструктурни проекти – железници, автопати, здравствена и енергетска инфраструктура. Но, спротивно на спиновите на дел од опозицијата, во него никаде не се споменуваат бегалски кампови“, рече Милошоски, одговарајќи на новинарско прашање.
Тој објасни дека по излегувањето од ЕУ, Британија склучува ваков тип договори со сите земји од Западен Балкан и со самата Унија, со цел зајакнување на основата за соработка со Фронтекс во борбата против организирана и нелегална миграција.
„Овој механизам е комплементарен со Фронтекс. А најдобар демант на шпекулациите е изјавата на британскиот амбасадор, кој јасно кажа дека договорот се однесува на инфраструктура, економија, безбедност и образование – но не и на бегалски кампови“, додаде Милошоски.
Изјавата следува по текстовите на британски медиуми, кои објавија дека Лондон преговара со Скопје за можноста да депортира одбиени азиланти во Северна Македонија. Според тие информации, формалните разговори меѓу двете влади започнале уште есенва.