Иако постои мало зголемување од 0,4%, сепак бројот на објавени истражувачки стории кај 10 селектирани медиуми сè уште е многу мал и не достигнува ни 1 процент, покажа мониторингот за известувањето на 10 медиуми, спроведуван од невладините организации: Центар за граѓански комуникации, БИРН и НВО Инфо Центар.
Додека траел мониторингот биле регистрирани 270 новинарски прилози и текстови со истражувачко – аналитички карактер, или тоа се вкупно 8,8% од вкупниот број објавени материјали. Најмногу истражувања има за економија и политика, но најмалку има за корупција, здравство, судство и други теми. Билјана Бејкова од НВО Инфо Центар рече дека според податоците, 40% од прилозите и текстовите се еднострани.
Најазастапен извор на информации се државните инсититуции, на второ место се искачија универзитетските експерти и граѓанскиот сектор. Тамара Чаусидис од Самостојниот синдикат на новинари и медиумски работници рече дека новинарите ја загубиле веста, и дека таа е на социјалните мрежи, но тоа што останува се истражувањето и контекстот на приказните.
Во препораките се наведува дека медиумите и новинарите треба да го подобрат квалитетот и кредибилитетот, не само на дневното новинарство, туку и на аналитичкото и истражувачкото новинарство, а уредниците треба повеќе да инсистираат на зачувуввање на професионалните новинарски стандарди.
Препораките за новинарите се задолжително во истражувањата да ги вклучуваат сите засегнати страни, а истражувањата да вклучуваат повеќе извори, документи и факти.
В. М.