Министерот за правда, Бојан Маричиќ ќе се залага за отворени кандидатски листи, иако вели дека одлуката сепак зависи од партиите во Собранието.
„Тоа е закон кој иако се носи со апсолутно мнозинство, добрата воспоставена пракса на политички дијалог укажува на тоа дека тој закон се носи со консензус. Од СДСМ има определба за една изборна единица, но зависи од волјата на останатие. Тоа е системска промена која треба да има консензус околу неа за да можеме да ја спроведеме. Доколку сите партии или главните, клучните со најмногу пратеници во Собрание се согласат околу оваа реформа, ќе ја вградиме“, рече Маричиќ.
Тој сепак вели дека ќе може да се постигне согласност за отворени советнички листи на следните локални избори.
„Верувам дека можеме да постигнеме согласност, наредните локални избори во следниот октомври да овозможат еден степен повеќе на демократизација, а тоа е на советничките листи да се гласа со преференцијални гласови. Тоа ќе биде еден чекор напред за сосема отворени кандидатски листи и една изборна единица“, вели Маричиќ.
Според Маричиќ, директниот избор ќе значи поголема врска на избраните со нивните сограѓани, наместо силна врска и зависност само од политичките партии.
Тој на неговата прва прес конференција како министер за правда најави и ветинг во правосудството.