Mакедонија и Унгарија остануваат најкритичните земји во Европа според слободата на медиумите. Поради овој податок, Меѓународната партнерска група на организации кои работат на овој проблем кон крајот на минатата година ги скенирала состојбите во овие две држави.
Испитувањето покажало дека во Македонија слободата на медиумите се влошува, додека во Унгарија се бележи извесен напредок.
Претседателот на Здружението на новинари на Македонија, Насер Селмани кој веќе неколку месеци безуспешно се обидува да издејствува декриминализација на клеветата, вели дека Владата нема слух за слободата на медиумите.
Во извештајот се спомнува потребата од декриминализација на клеветата, вклученост на новинарите во изготвување на законот за медиуми кој владата тајно го подготвува, плурализам на мислењата, реформиран јавен сервис, неселективно законодавство.
Меѓународната партнерска група за слобода на медиумите упатила и остри критики за владините реклами, за ланското проширувањето на Советот за радиодифузија, како и за затворањето на А1 Телевизија и трите весници.
Од ЗНМ велат, ние го кажавме своето, а сега чекаат на Владата да ги повика на дебата за конкретните решенија во делот на медиумската слобода.
И во последниот извештај на Фридом Хаус, Македонија бележи пад во слободата на печатените медиуми и се најде на 115-то место, само шест поени пред Северна Кореја.
Јасмина Јакимова