Иако во Албанија сеуште трае пребројувањето на гласачките ливчиња, сепак од македонската партија, Македонска алијанса за европска интеграција (МАЕИ), потврдија дека не успеале да обезбедат пратенички мандат.
Најсериозниот кандидат за пратеник од МАЕИ, во Изброната единица Корча, Валентина Нестро не ги доби потребните 3.500 гласови, колку што и беа потребни за да влезе во албанскиот законодавен дом, како прва Македонка предложена од македонската партија.
Според партискиот лидер Едмонд Темелко, кој ја потврди веста, сепак на овие избори, споредено со претходните, од 2009 година, бројот на гласови кои ги добила партијата во местата каде што живеат поголем број Македонци се неколкупати поголеми.
Во меѓувреме опозициската социјалистичка партија на Еди Рама го повика актуелниот премиер и лидер на демократите, Сали Бериша да го признае поразот и да се повлече од премиерската функција.
Од досега преброените гласачки ливчиња, коалицијата „Алијаса за европска Албанија“ предводена од социјалистите на Рама има освоено 51 пратеничко место, 47 социјалистите и четири Движењето за социјалистичка интеграција на Илир Мета. Коалицијата „Алијаса за работа, благосостојба и интеграција“ предводена од демократите на Бериша, во која беше и МАЕИ, има освоено 36 пратенички места од нив 33 демократите и три партијата на Чамите, на Шпетим Идризи.