„Во отсуство на официјални информациии а со деталите пренесени од грчките медиуми според кои се бара промена на Уставот, име, нација, идентитет, јазик и историја, во однос на разговорите меѓу Грција и Македонија за спорот со името се добива впечаток дека во голема мера е излезено од рамката на преговорите. Според тоа, македонската страна ни приближно не обезбедила рамноправен статус во разговорите со Грција.
На овој начин резолуциите 817 и 845 и Времената спогодба, како документи на ОН, се тргнати на страна како да не постојат. Тоа укажува дека надвор од досегашниот тек на решавањето на овој спор, Грција наметнала да се бараат нови решенија само врз основа на нејзините интереси.
Повеќе од јасно е дека грчките барања за промена на Уставот на РМ фактички го негираат нашиот национален идентитет и постоење како посебен народ. Затоа, Либералната партија повикува на национален консензус и меѓупартиски договор (власт и опозиција) со цел да се отфрли условот за уставни промени „ерга омнес“, бидејќи е спротивно на Резолуцијата 817 на Советот за безбедност и другите документи на ОН. Впрочем, уставните промени што се навестуваат и ново име ерга омнес е отфрлено уште при усвојувањето на споменатите резолуции и Времената спогодба од 13 септември 1995 година.
Премиерот Заев треба да е свесен за овие факти и треба да води сметка за нив кога ќе разговара со грчкиот премиер Ципрас на 17 мај 2018 во Софија.
Либералната партија смета дека НАТО и ЕУ интеграцијата се нашиот единствен пат, а постигнувањето на одржливо решение засновано на сите досегашни меѓународни документи е од заеднички интерес и на Република Македонија и на Грција и на членките на овие асоцијации, бидејќи на тој начин јакне стабилноста во земјата и регионот“, се вели во соопштението на Либералната партија.