„Либералната партија го поздравува барањето на Групацијата на пазари при Стопанската комора на Македонија за решавањето на проблемот со дивите пазарџии кои на улица, од камиони продаваат сезонско овошје и зеленчук. Овие диви продавачи не само што нелегално тргуваат и создаваат нелојална конкуренција, туку и ја загрозуваат безбедноста во сообраќајот и дополнително ја загадуваат околината, создавајќи отпад од кој се шират разни болести кои влијаат на здравјето на граѓаните.
Финансиската загуба поради нивното неконтролирано и неконкурентно дејствување изнесува 20 отсто од вкупниот приход на организаторите на пазарите.
За да се стави крај на овој 25 годишен проблем со нелојалната конкуренција, потребна е континуирана (не сезонска пред избори) акција на Министерството за внатрешни работи, пазарната и комуналната инспекција, преку конфискација на стока, заплена на моторни возила и парични казни на дивите продавачи во скопските општини и градот Скопје, како и во останатите населени места во Р. Македонија“, се вели во соопштението на ЛП.