Министерот за правда Кренар Лога очекува за многу брзо Љупчо Палевски – Палчо, првоосомничениот за убиството на 14 годишната Вања Ѓорчевска и 74 годишниот Панче Жежовски да биде екстрадиран во Македонија. Списите од министерството веќе се преведени на турски јазик, а очекува до крајот на денот и списите од обвинителството да бидат преведени.
„Вчера беше потпишано од моја страна. Сите списи беа преведени на турски јазик, денеска до крај на работен ден исто така ќе бидат преведени списите на Јавното обвинителство и денеска ќе биде пуштено преку електронска пошта и преку нашата амбасада. Верувам дека после добивањето, ќе контактираме дирекно со министерот за правда на Турција“, рече Лога.
Според него, Турција е стратешки партнер на Македонија за многу битни прашања и не верува дека ќе има задржување во однос на осомничениот.