Претседавачот на ОБСЕ и министер за надворешни работи на Австрија, Себастијан Курц и генералниот секретар на ОБСЕ, Ламберто Заниер остро го осудија вчерашниот напад на Собранието на Република Македонија
Тие сметаат дека насилството не смее да биде замена за политичките решенија. Такви решенија треба да бидат пронајдени низ демократските процеси.
– Нападот на неколку пратеници на Собранието и влегувањето во зградата на парламентот, што треба да биде срцето на демократија, се шокантни. Ова е акт на заплашување, напад врз претставниците на народот што јас без колебање го осудувам. Редот и мирот мора да бидат вратени веднаш. Ги повикувам сите страни да се воздржат од понатамошно ескалирање на тензијата и насилството, рекол Курц.
Генералниот секретар Заниер смета дека за насилството нема место во политичкиот процес.
– Насилството мора да запре веднаш. Полицијата мора да ја гарантира безбедноста на пратениците и да ги изнесе сторителите пред лицето на правдата, изјави Заниер.
Двајцата ги повикаа политичките актери да го продолжат дијалогот во парламентот и да ги почитуваат демократските принципи, како и резултатите од изборите во декември.