Градоначалникот на општина Куманово, Максим Димитриевски денеска се сретна со амбасадорот на Франција во Македонија, Кристијан Тимоние.
На средбата станало збор за досегашните и продолжување на проектите кои Куманово ги реализира со Француската амбасада.
– Разговаравме за соработката помеѓу училиштата од Куманово со француските училишта. Денеска група ученици од кумановската гимназија „Гоце Делчев“ заминува во посета на француско училиште. Разговараме и за можна соработка преку невладините организации преку кои ќе бидат вклучени припадници од сите етнички заедници од Куманово, изјави по средбата Димитриевски.
На средбата градоначалникот и амбасадорот зборувале и за отпочнување нови проекти, при што граѓаните на двете држави ќе имаат можност за меѓусебно запознавање и соработка.
Амбасадорот, Тимоние очекува успешна работа на градоначалникот и идниот совет на општина Куманово. Тој додаде дека со градоначалникот разговарале за конкретни проекти. Димитриевски, посочи дека го информирал за тековните инфраструктурни проекти, плановите за развој на општината.
– За нас, Куманово мора да биде симбол на успешна Македонија, бидејќи со различните заедници кои што живеат во општината, со културната традиција, со историјата, градот Куманово треба да покаже дека е град кој чекори кон Европа, рече Тимоние.
Истакна дека учениците кои заминуваат во Франција се симбол на Куманово и се заблагодари на семејствата од градот кои претходно ги пречекале француските средношколци, нагласувајќи дека токму на тој начин се подготвуваат утрешните европски граѓани.
– Предлагам Куманово да стане своевидно француско-македонско ателје за утрешна Европа, рече амбасадорот.
Во делот на планираните проекти било разговарано за поврзување на младите луѓе од Франција и Куманово.