За иднината на истрагите на СЈО и за преземањето предмети од редовните обвинителства, освен новиот закон кој е во подготовка, ќе „пресуди“ и автентичното толкување на Законот за специјалното јавно обвинителство, кое кривичниот суд ќе го побара преку државниот јавен обвинител од Собранието. Ова било одлучено на судискиот колегиум во кривичниот суд кој се одржал вчера попладнето.
Најпрвин државниот обвинител Љубомир Јовески ќе треба да се произнесе за тоа кое обвинителство треба да ги води предметите на СЈО кои беа оспорени со мислењето на Врховниот суд, но и ќе се бара автентично толкување од Собранието на членот 22 од Законот за СЈО, за кој, Врховниот суд даде мислење, дека Катица Јанева повеќе не е овластен тужител за да отвора истраги покренува обвиненија.
Јовески веќе јавно го соопшти ставот дека Врховниот суд не бил надлежен да одлучува за ова прашање бидејќи не станува збор за невоедначена пракса на судовите, туку за толкување на закон што е надлежност на Собранието.
Највисокиот суд минатата недела донесе начелно мислење дека рокот од 18 месеци за обвиненија и истраги СЈО требало да го смета од моментот кога биле преземни бомбите, а не од секој поединечно од преземањето на секој предмет од редовното обвинителство.
Васко Маглешов