Секторот за внатрешни работи од Скопје во рамки на акцијата „Мрежа“ поднесе кривична пријава против 25-годишниот Д.Г. од Скопје поради основано сомневање дека сторил кривично дело „неовластено производство и пуштање во промет наркотични дроги психотропни супстанци и прекурзори“.
На осомничениот му е одредена мерка притвор во траење од 30 дена.
Тој во текот на годинава набавил семе од „канабис сатива“ и го засадил во месноста викана „Песовци“ во атарот на Драчево при што стеблата ги одгледувал во пластеник и ги наводнувал преку систем „капка по капка“.
На 5 октомври извршен е претрес на парцелата која била сопственост на В.С., а осомничениот ја изнајмил и користел. Во еден од пластениците се пронајдени 135 стебла кои се предадени за вештачење и е потврдено дека се „канабис сатива“.
Досега во рамки на акцијата поднесени се кривични пријави против повеќе од 195 лица и запленети се над 540 килограми најразновидни наркотични средства и стебла од растението канабис.