Премиерот Димитар Ковачевски ќе излезе на дуел со лидерот на опозициската ВМРО – ДПМНЕ Христијан Мицкоски кога за тоа ќе дојде време. Тој денес на пуштањето во употреба на нова телекомуникациска опрема на АД МЕПСО, одговарајќи на новинарско прашање рече дека е подготвен за дуел со секого во државата.
„Што се однесува до дуел, дебата, разговор со кого било во државата вклучително и со претседателот на една од опозициските партии и тоа ќе се случи меѓутоа јас во една прилика кажав дека справување со енергетска и со економска криза не се прави преку дуел и политичка дебата туку се прави преку работа, преку соработка и преку посветено работење пред сè во Парламентот каде што треба да бидат одобрувани сите закони и сите решенија кои се од интерес на граѓаните а не да се блокира се она кое значи добивање политички поени на ситно, а во исто време да не може да се реализираат антикризни мерки или финансирање на ликвидноста на секторот. За се ќе дојде време, ќе дојде време и за тоа“, рече премиерот Ковачевски.
Лидерот на ВМРО-ДПМНЕ Христијан Мицкоски повеќе пати јавно го повика премиерот Димитар Ковачевски на ТВ-дебата за справување со енергетската криза, покана на која премиерот преку медиумите одговори дека место да се дебатира треба да се работи на изнаоѓање решенија за надминување на кризата.