Министерството за образование и наука објави Конкурс за прием на ученици во јавните ученички домови во земјава за учебната 2021/2022 година. Со конкурсот се слободни вкупно 2578 места за сместување и исхрана на ученици од средното образование, во 18 домови во Скопје, Битола, Велес, Гостивар, Кавадарци, Куманиово, Крива Паланка, Охрид, Македонски Брод, Кратово, Струмица, Струга, Свети Николе и Штип.
Согласно здравствениот протокол за справување со Ковид-19, во јавните ученички домови во една соба се сместуваат 50 отсто ученици од вкупниот капацитет на собата и право на сместување ќе имаат само учениците кои имаат настава со физичко присуство или комбинирана настава.
Доколку во текот на идната учебна година се надмине пандемијата и ќе се создадат услови за сместување со полн капацитет, во домот ќе се сместат сите ученици кои стекнале право на сместување со Конкурсот.
Првенство при прием во ученичките домови ќе имаат ученици запишани во I, II, III или IV година во Државното средно училиште Спортската академија во Скопје и дисперзираните паралелки на ова училиште во другите градови низ земјава.
Учениците кои се пријавуваат на Конкурсот треба да пополнат електронска пријава поставена на веб-страницата www.konkursi.mon.gov.mk. Рокот за електронското пријавување на учениците кои се запишани во втора, трета и четврта година ќе почне од 24 јуни и трае до 1 јули 2021, а рокот за електронското пријавување на учениците кои се запишани во прва година почнува од 2 јули и ќе трае до 9 јули 2021.
Листата на примени ученици ќе биде објавена на веб-страницата на Министерството за образование и наука, како и на огласната табла на домот најдоцна до 15 август, а вселувањето на примените ученици ќе почне од 31 август 2021. Учениците што ќе бидат примени за сместување и исхрана во дом, сами ќе ги плаќаат трошоците за превоз од и до постојаното место на живеење.
Во Конкурсот на МОН се наведени повеќе информации за условите за прием на ученици во јавните ученички домови, потребните документи, начинот на пријавување и постапката за прием.