Соочени со вонредната ситуација поради студот и поледиците кои се создадоа по улиците, вработените во КЈП „Водовод“ Кочани веќе трет ден ги активираа дежурните служби кои фрлија шест тони сол и 33 кубици песок за колку-толку да го нормализираат сообраќајот и движењето на граѓаните.
– Поларните температури веќе го земаат данокот во семејните куќи и домови на жителите на општина Кочани и пошироко. Граѓаните се жалат на замрзнати цевки кои ги оставиле без вода во домовите, а се регистрирани и пукања на цевководите. Сепак реалните штети од невремето ќе се видат дури откако времето ќе попушти и ќе потече водата, изјави Аклександар Ефтимов, технички директор на кочански Водовод.
Во КЈП „Водовод“, истакна Ефтимов, последните пет дена е евидентирана зголемена потрошувачка на вода од 140 на 180 литри во секунда. И во услови на поларни температури системот за водоснабдување е во добра кондиција што значи дека водата стигнува до сите потрошувачи, посочи тој.