Државниот инспекторат за локална самоуправа донесе решение да ги запре одлуките за организирање локални референдуми во општините за мигрантите на денот на Локалните избори, 15 октомври, и да поведе постапка пред Уставниот суд за оценување на уставноста и законитоста на донесените одлуки.
Како што информира државниот инспектор за локална самоуправа Рахим Муслиу, решение досега е донесено за 12 општини кои доставиле до Инспекторатот извештај од јавното општинско гласило во кое е објавена одлуката за спроведување референдум, а се очекува да бидат доставени уште две.
– На 20 септември, Инспекторатот изврши вонреден инспекциски надзор во општините Кочани и Штип, а на 21 септември во Гевгелија, Кавадарци, Неготино и Велес. Уште шест општини донеле одлука за референдум на локално ниво и го известиле Инспекторатот за објавување. Тоа се Битола, Прилеп, Радовиш, Аеродром, Гази Баба и Охрид, а се очекува вакви известувања да достават и општините Карпош и Ѓорче Петров, рече Муслиу.
Одлуката ќе биде доставена до Министерството за локална самоуправа, државниот секретар за локална самоуправа и до градоначалниците и советите на засегнатите општини, а градоначалниците ќе имаат обврска да ги известат и општинските изборни комисии за да ги прекинат понатамошните активности.
Одлуката, како што истакна Рахим, ќе биде објавена во Службен весник, а во наредните три дена и на веб страницата на Министерството за локална самоуправа во делот на Државниот инспекторат за локална самоуправа.
Причина за нејзиното донесување, како што кажа, е член 22 од Законот за локална самоуправа, според кој никаде не е наведено дека општините имаат надлежност за мигрантите и за нивното населување во локалната самоуправа