Коалицијата со Алијансата за Албанците ќе донесе големи промени кон подобро, порача лидерот на движењето БЕСА и кандидат за градоначалник на Тетово Биљал Касами на денешните средби со граѓани заедно со коалицискиот партнер Зијадин Села, на кои ги претстави проектите од изборната програма.
– Оваа коалиција значи почеток на промени за добро на Албанците. Доволно беше владеење што во прв план го има личниот интерес, а не доброто на сите граѓани. Како резултат на тоа може да се види во каква ситуација сме доведени, рече Касами и додаде дека соработката ќе продолжи и во иднина.
Нагласи дека Албанците дојдоа до ситуација СДСМ со својот претседател и заедно со ДУИ да доаѓа во нивните општини и да им кажува кој треба да биде градоначалник и кој треба да ги води во наредните четири години.
– Верувам дека граѓаните сфаќаат дека тие се оние што решаваат и ќе решат кој најдобро ќе ги води во наредните четири години. Ние не сме за ВМРО, ниту за СДСМ. Нам ни се важни интересите на Албанците и ќе работиме за Албанците. Тие што работат за СДСМ, а вчера биле за ВМРО, мислат дека и другите се такви. Јас ви ветувам дека ќе работам во служба на сите граѓани на општина Тетово, порача Касами и вети урбан развој и хигиена, како и поддршка за универзитетите.